تتعلم في هذا الدرس إيقاع الشفتتلي بعد التشريح و التحليل و يعطي نزار أمثلة على هذا الإيقاع.

نزار الحمود:

"مرحبا، أنا نزار من إعزف دوت كوم، واليوم في حصتنا رقم عشرين، رح نتعلم إيقاع جديد.

إيقاع طويل شوي، حاولت إني أقسمه نصين بحيث يكون مزورتين، بس هو بنعزف ككتلة واحد أو وحدة واحدة، هذا الإيقاع اسمه إيقاع الشفتتلي، اسمعوا كيف بنعزف قبل ما نحكي عنه (يعزف الاستاذ نزار التمرين).

تمام، هذا الإيقاع بستخدموه في التقاسيم كثير، التقاسيم يعني مثلاً خليني أبسط لكم إياها كثير، لما مثلاً بتسمعوا مغني بحكي يا ليلي يا ليل يا عيني وهيك، بيكون هذا الإيقاع هو اللي بينعزف بشكل عام، هذا الإيقاع مكون من ضربات دُم وضربات إس.

طبعاً هذا من أكثر الايقاعات اللي بحبها الإيقاعيين، أنا عم بحكي عن نفسي شخصياً، فيها كثير تنويع وتشكيل، بس هلأ بدنا نسمعه بضرباته الاساسية بدون تشكيل، طبعاً هذا الأيقاع هو مبني على الإحساس أكثر، يعني إذا حاولنا نشوفه منوت كتير صعب نلاقي بالنوتة تبعته، لأنه كتير بعتمد على الإحساس بس أنا اللي عملته أنا قسمت الإيقاع لجزئين بوزن أربعة أربعة، بحيث إنه ينلعب أو ينعزف كبار واحد خلينا نتخيل، بس هو مقسوم لبارين أو مزورتين.

نشوف من إيش مكون، هو مكون من دُم إس إس تك إس إس تك إس، هذه المزورة الأولى، والمزورة الثانية مكون دُم إس دُم إس تك إس إس إس، طبعاً السكتة الأخيرة فيه هي اللي بتعطي زي هيك، بصير قوي أو بصير يعني في فراغ محسوس، يعني نسمعه كيف (يعزف الأستاذ نزار التمرين).

تمام، لو بدنا نيجي نقسمه لنصاص، عشان نعزف نعده ونعده بطريقة ون أند تو أند ثري أند فور أند، رح نلاقي عنا هلأ على الشاشة التالي هيك(يقرأ الأستاذ نزار التمرين قراءة إيقاعية)، خلينا نعزف على المترونوم خلينا نحط على المترونوم أربعة أربعة والسرعة خمسين ضربة في الدقيقة والعد ون أند تو أند ثري أند فور أند، (يقرأ الأستاذ نزار التمرين قراءة إيقاعية).

زي ما حكينا إحنا قسمناه لمزورتين من باب التسهيل من باب الحفظ، حكينا أربعة على أربعة، وهو مقسم مثلاً بالمزورة الأولى بنشوف دُم إس إس تك إس إس تك إس، بنشوف إنه نص نص نص نص والمزورة الثانية دُم إس دُم إس تك إس إس إس، هذا الإيقاع جداً جميل وبالدروس الجاي شوي رح نتعرف على طرق من تشكيلاته، كيف نشكله؟ كيف نعزفه بطريقة مختلفة؟ طبعاً كالعادة ممكن التك نبدلها بسك عادي وإذا لاحظنا بدرس مرق قبل هيك إنه استعملنا السك بنوتت التك يعني سوداء وعصاي لتحت مثلاً، وفي فوقها إكس، فصار عندي تك اليمين فوقها زائد، وتك الشمال فوقها ناقص، والسك فوقها إشارة الإكس، لو بدي أعزفه مع صوت السك، بصير عندي (يعزف الأستاذ نزار التمرين).

بهاي الطريقة إحنا عزفنا إيقاع الشفتتلي، إيقاع الشفتتلي مش من الضرورة إنه نوصل فيه لسرعات عالية، لأنه دايماً هو الإيقاع اللي بسلطنوا عليه الناس وبيصيروا بتمايلوا زي هيك، خلص ببحروا في عالم الموسيقى، في هذا الإيقاع السرعة مش مطلوبة، بقدر ما إنه نتمكن من انه نطلع كل صوت على حدا أو لحاله بشكل سليم وبشكل انه نحسس أو نشبع الإيقاع، ممكن إنه نتعرض لكيف نشكل هذا الإيقاع في الدروس الجاي، خلينا نتدرب كتير على هذا الإيقاع، ونحاول انه نبدأ بسرعة ونشوف سرعة أبطء منها، ونشوف سرعة بينهم، يعني زي ما تعودتوا التمرين الاضافي اللي بطلع عندكم خلينا نعمله، خلينا نتقنه، عشان نشوف الدرس اللي بعده شو رح نتعلم، فبشوفكم الحصة الجاي. 

باي باي."